يا بلد ندم من فيكي اتولد..

يا بلد أكتر ما فيكي النكد..
يا بلد ندم من فيكي اتولد..
ندم على ذنب ماعملهوش..
وعشان ضعيف, وماعندوش..
ضهر يتحامى فيه..
قلبك ما كانش عليه..
ماحميتهوش..
يا بلد أكتر ما فيكي النكد..
يا بلد ندم من فيكي اتولد..
غلط من سمّاكي أم البلاد..
وإزاي أم تقتل ولادها؟
ماغلطش مِن سابك من غير معاد..
ماستحملش يتظلم في بلده.. جوّا حدودها!
يا بلد أكتر ما فيكي النكد..
يا بلد ندم من فيكي اتولد..
كان نفسي بإيديا أعلّيكي..
أكون فخر ليكي..
بس ليه تكون جزاتي..
إني أتقتل على إيديكي؟!
يا بلد أكتر ما فيكي النكد..
يا بلد ندم من فيكي اتولد..

***

واللهِ مش ذنبي يابني..
واللهِ أنا زيك مقهورة..
لأ مش أنا إلي تحاسبني..
أنا زيي زيّك مأسورة..
إلي على إيده انتَ اتظلمت.. ظلمني..
وإلي كسرك.. على إيده أنا مكسورة!
مثّل إنه بيناضل عشاني..
ورسمني ليك بأبشع صورة..
مش تلومني أرجوك يا إبني..
إلي ظالمك ظالمني..
وإلي على إيده اتكسرت..
أنا على إيده مكسورة!